An de leschte Joren huet een ëmmer méi iwwert dat Thema „Pädagogie mat Déieren“ héieren, a speziell Schoulmuppen sinn ëmmer méi ausgebilt ginn. Si begleeden den Enseignant mat an d’Klass an huelen och aktiv um Unterrecht deel.

Den LTEtt huet sech Gedanke gemaach, wéi déi komplett Schoulgemeinschaft vun der Offer „Schoulmupp“ profitéiere kéint, an esou huet d’Enseignante Annick Jado 2022 d’Ausbildung mat 4 vun hire Muppen ugefaangen. D’Iddi hannendru war, dass d’Muppen sech net nëmmen ofwiessele kënnen, mä dass all aneren Enseignant, a virun allem all Klass aus dem LTEtt, d’Chance kritt, bei d’Schoumuppen ze kommen.

Am Oktober 2022 ass de Projet ugelaf an hat schnell grousse Succès. D‘Enseignantë kënne sech mat hire Klassen umellen, an 1x d’Woch zu bestëmmten Auerzäite bei d’Schoulmuppe kommen. Do profitéieren si net nëmmen dovunner, dass d’Muppen do sinn, mä dat Ganzt leeft och nach interaktiv. Sou kréie si an 2 Schoulstonne wichteg Informatiounen, wat et heescht en Hond ze hunn, Verantwortung ze iwwerhuelen, a si gi gewuer, wat eis 4-beeneg Begleeder alles maache kënnen: vun Agilitymuppen, iwwer Therapiemuppen bis hin zu Assistenzhënn, ass eng Hellewull un Erklärungen an Abléck an d’Liewe mam Hond méiglech. Weider ginn et nach fachiwwergräifend Spiller, si meeschteren zesumme mam Hond kleng Aufgaben, a léieren esou den Ëmgang an d’Koordinatioun mat engem Liewewiesen. 

Bis ewell huet de Projet e rise Succès, an et si schonn eng jett Klasse mat hirem Enseignant, an deem speziell fir d’Schoulmuppen ausgeluechte Sall, passéiert. D’Muppe si begeeschtert a freeë sech drop, mat hirer Besëtzerin bei d’SchülerInne „schaffen“ ze goen.